Decir «Nuberu» ye falar de un dúu carismáticu y hestóricu na música asturiana dende va un cuartu de sieglu. Chus Pedro Suárez y Manolo Peñayos, cantautores coaniciadores del grupu «Camaretá» nos años setenta, punsieron-y música a les reivindicaciones de la transición política n'Asturies; munchos de los sos cantares ficieronse perpopulares, y n'algún casu –«Aida la fuente», «A Juanin, l'home de la unidá»... – llegaron a ser auténticos himnos pa la izquierda asturiana. Fueron tamién el primer grupu n'inxerir la gaita nun contestu d'instrumentos modernos, algamando por ello'l so gaiteru, Manolo Quirós, abonda sonadía.

«Como tú yes» ye un discu grabáu en directo nel Teatro Campoamor d'Uviéu n'Abril de 1991 col que Nuberu entamó una nueva época na so carrera. Arrecuéyense nelli tolos sos ésitos de los años setenta y primeros ochenta, y cuenta con collaboraciones de tantu altor como Jose Angel Hevia, El Che de Cabaños o el propiu Manolo Quirós. Too ello perbien interpretado por una escelente banda dirixía por Gabino Antuña y Julio Sánchez Andrade, responsables dende va años de les igües musicales de los sos temes.

«Agua de la fonte clara» amuesa el nuevu camín de Nuberu nos años 90. Destaquen nelli temes como'l que da títulu al discu, del que ye autor Victor Manuel San José, o «Delina», una versión d'una balada irlandesa, que Chus Pedro dedica a la memoria de so madre.

«Mineros» ye una remasterización d'un elepé monográficu adicáu a los protagonistes del trabayu na mina, que grabara en solitario nos caberos años ochenta Chus Pedro Suárez. «En el pozu Maria Luisa», «La mula torda», «Mineru lu quiero madre»... son dalgunes de les canciones que s'inclúin nesti CD que canta a la minería de les cuenques asturianes. Una cultura de trabayu, qu'a lo llargo de sieglu y mediu foi parte fundamental de la hestoria d'Asturies, y que ta a puntu d'esapaecer.