Rafael Lorenzo ye un cantautor que magar pertenecer a la xeneración del «Nuevu Canciu Astur» (años setenta ) y tener compartío escenariu d'aquella con Carlos Rubiera, Nuberu o Víctor Manuel, nun asoleya'l so primer discu hasta 1998. Con «La otra Asturias», qu'asina lu titula, reivindica en diez canciones l'Asturies de les brañes y la marina occidental: «Romance de Luarca», «Vaqueiros», «Buelo».

Nel so nuevu y esperáu trabayu, qu'asoleyamos casi al empar qu'esti catálogu, «A.Camí », úfrenos una pequeña antoloxía de Alfonso Camín, un homenax sentíu y merecíu a un gran poeta asturianu escaecíu. Los ritmos cálidos de l'América de la emigración astur tan presentes nesti nuevu discu –«Puerto Rico del Pez Vela», «Indiano Viejo», «Tequila»– pero tamién les referencies fondes a la tierra d'orixe –«Al son del carro», «Elogio del oso pardo»–. Rafael Lorenzo amuesanos amás la so madurez como cantante y compositor. Les igües de los dos discos son de Javi Rubio.