Dende la so fundación en 1989 Esbardu vien dedicandoo abondos esfuerzos al estudiu, recuperación, y divulgación del folklore tradicional d´Asturies, sobre manera dende la so base d´operaciones, la ciudá d´Avilés, onde lleva dellos años entamando un de los más renomaos y esitosos festivales intercélticos del país. El presente discu, El suañu, compónse de cuatro partes estremaes, onde cada parte refierse a una estación del añu (Primavera, Verañu, Seronda y Ibiernu). El conteníu de la primera estación compónenlu tres pieces del repertoriu popular y tradicional asturianu, iguaes pa ser interpretaes por bandes de gaites. Na segunda estación separtámonos de les nuestres fronteres xeográfiques a la gueta de les ideales por semeyanza cultural. Fronteres de mar y sables a la fin. Na Seronda alcontramos tres bailles tradicionales representativos d´otros tantos conceyos asturianos. Cangas, Somiedu ya Tinéu son los escoyíos pola brillantez y fuercia del so folklore. L´Ibiernu ye la estación del añu más dura, la más tristaya y desixente. Vamos a alcontrar nella tres estremaes formes de manifestaciones culturales, que magar que tengan existío desde cuantayá, fueron pa sobrevivir fasta nós ensin perda del so encantu y frescor.